Unha nova lei permitiralle ao Sergas cubrir algunhas prazas de médico sen oposición
Afectaralles ás especialidades de difícil cobertura e tamén a aquelas zonas do territorio galego onde é máis difícil cubrir as prazas
É unha das medidas da Xunta para tentar poñerlle solución á falta de médicos
A Xunta de Galicia iniciou a tramitación da normativa que estenderá a provisión por concurso de méritos ás prazas de difícil cobertura do Sergas en prazas de atención primaria, hospitais comarcais e saúde mental.
Tal como explicou o Executivo autonómico nun comunicado, a tramitación desta norma se realiza con carácter de urxencia, habilitando un prazo de sete días hábiles para a presentación de suxestións.
A idea é apurar o trámite desta normativa para resolver "canto antes" as necesidades organizativas actuais e garantir a continuidade asistencial e a calidade dos servizos sanitarios.
"A necesidade de dotar de máis recursos humanos e cubrir prazas vacantes en zonas de difícil cobertura da comunidade motivou que a Xunta impulsase esta medida lexislativa, coa que pretende paliar en parte o déficit de médicos e profesionais sanitarios, unha situación que afecta a todas a comunidade autónoma nestes momentos mentres continúa o incumprimento dos compromisos da reforma da lexislación estatal", lamentou o Goberno galego.
Esta nova lei pretende ampliar a convocatoria máis aló da atención primeira, que xa en 2022 cubriu máis de 100 postos desta forma, estendéndose tamén ás especialidades máis difíciles de cubrir en hospitais comarcais (como traumatólogos, radiólogos ou internistas) e en saúde mental.
As persoas elixidas terán que permanecer un mínimo de dous anos no posto adxudicado.
