Tras un ano, aínda non declarou o condutor do coche en que morreron catro mozos en Xove

Hai un ano, catro mozos morrían nun terrible accidente en Xove. No coche ían seis pasaxeiros, pero dos dous superviventes só un prestou declaración no xulgado. 

O que aínda non o fixo, un ano despois, é o condutor do vehículo. Segundo os informes médicos presentados polos seus avogados, o mozo non está en condicións de realizar esa dilixencia, pero o Xulgado Número 2 de Viveiro, que instrúe o caso, solicitou que o mozo sexa examinado por un forense do Imelga, e será o instituto forense o que determine se debe ou non comparecer ante a sede xudicial.

Quen xa declarou foi o outro supervivente, que está investigado por un delito de omisión de socorro por marchar do lugar do accidente, a onde regresou horas despois. Tamén xa están rematados todos os informes do sinistro, en que faleceron catro mozos de entre 17 e 19 anos.

O accidente ocorreu nun traxecto curto, un quilómetro e medio era a distancia entre a verbena da que viñan e o piso ao que ían na urbanización de Palmeiro. O vehículo saíu da vía, bateu contra un poste eléctrico, sobrevoou un terraplén e deu varias voltas de campá.