Trump: "Chegou o momento de que Ucraína teña un novo presidente"

O presidente dos Estados Unidos, Donald Trump, cargou este sábado contra o seu homólogo ucraíno, Volodímir Zelenski, a conta dos bombardeos de Kíiv contra refinerías gasóleo rusas e dixo que "chegou o momento de que Ucraína teña un novo presidente".

As declaracións do magnate aos medios no exterior da Casa Branca chegan despois de que a delegación enviada por Kíiv á Florida para manter conversas cos enviados especiais estadounidenses para o país europeo adiantara o seu regreso.

Tamén se producen horas despois de que o propio Trump anunciara a autorización das operacións rusas con gasóleo ata abril para controlar a suba global de prezos.

"Dixémoslle: 'podes facer o que queiras con Rusia, pero non ataques as refinerías', porque ese é un problema mundial que el está a causar. E quere crear problemas para o mundo, problemas para os nosos agricultores, os nosos gandeiros, co combustible diésel, porque Rusia fornece unha gran parte deste combustible en todo o mundo", argumentou antes de partir a Tennessee, onde ofrecerá un mitin para as lexislativas.

Segundo afirmou, Zelenski non quixo chegar a acordos para pechar a guerra de Ucraína que, ao seu parecer, "comezou por mor da incompetencia". "Nunca debeu empezar. Non perderían xa o 30% do seu país", dixo do Goberno de Kíiv.

"Suxiro que busquen un novo líder capaz de chegar a un acordo, porque el podería pechar moitos acordos e, por algunha razón, nunca o fai (...). Chegou o momento de que Ucraína teña un novo presidente", sinalou.

Zelenski criticou o venres o acordo entre Trump e o seu homólogo ruso, Vladímir Putin, e cualificou o pacto de "inxusto" e "impropio dun aliado".

O acordo permitirá a Rusia exportar millóns de toneladas de diésel aos mercados estadounidense e internacionais malia as sancións en vigor de Washington sobre o sector enerxético ruso que pesan sobre Moscova desde o arranque da guerra no 2022.