Tráfico prevé tres millóns de desprazamentos en España para esta última fin de semana do Nadal

A Dirección Xeral de Tráfico (DXT) poñerá en marcha o venres a terceira e última fase da operación especial de Nadal, que se prolongará ata o domingo 7 de xaneiro coa previsión de tres millóns de desprazamentos.

Trátase do último tramo do dispositivo especial que Tráfico comezou o pasado 22 de decembro para garantir a mobilidade, a fluidez e a seguridade nas estradas ata o 7 de xaneiro, en dúas semanas en que se prevén en total case 20 millóns de desprazamentos.

Desde que comezou ese dispositivo perderon a vida en accidentes de tráfico 47 persoas.

A DXT incide en que "para evitar máis dor, é imprescindible ter en conta unha serie de recomendacións como planificar a viaxe con antelación e informarse sobre calquera incidencia na estrada; prestar atención á circulación no inverno, informándose das condicións meteorolóxicas e levando os elementos imprescindibles para circular; e ter máxima precaución nos traxectos curtos e nocturnos, aínda que sexan coñecidos.

Tráfico insiste así mesmo en que non se pode beber alcol nin tomar drogas ao volante. Tamén en que hai que viaxar co cinto de seguridade abrochado e ancorando correctamente os menores nos sistemas de retención infantil.