Segue a reducirse a ocupación hospitalaria en Galicia e baixan os casos de coronavirus
Lixeira repunta dos novos diagnósticos con 4.914 positivos, (+103)
Hai 44 enfermos nas UCI, tres máis que 24 horas antes
O Sergas notifica oito novas mortes pola covid, o que eleva a cifra a 2.969 falecidos durante a pandemia
Galicia continúa na fase da meseta desta sexta vaga da pandemia de coronavirus coa ómicron como a variante dominante. A incidencia continúa a reducirse na comunidade, aínda que con dentes de serra nos indicadores. Este sábado, con datos das 18 horas do venres, son 60.307 as infeccións activas, o que supón unha baixada de 1.834 casos de persoas co virus respecto das 24 horas anteriores, despois do lixeiro incremento da xornada anterior.
Trátase duns 20.000 infectados menos que o pasado 20 de xaneiro , cando Galicia rexistrou o pico desta vaga de contaxios.
Pola contra rexístrase unha lixeira repunta nos novos diagnósticos detectados nas probas diarias e son 4.914 os contaxios diarios, (+103).
Pero tamén é positiva a evolución da ocupación hospitalaria, agás nas UCI. Hai 643 persoas ingresadas, que son 25 menos que a xornada anterior. A redución dáse en planta con 599 enfermos, que son 28 menos, pero nas UCI están 44 persoas con terapia intensiva, tres máis que as 24 horas anteriores.
O Sergas notifica este sábado oito novas mortes nas últimas horas de pacientes diagnosticados por coronavirus. Así os falecidos desde o inicio da pandemia en Galicia son 2.969 persoas.
Situación por áreas sanitarias
As infeccións activas baixan en todas as demarcacións sanitarias de Galicia e a mellor situación nas UCI está en Ferrol con dous enfermos en agudos. Só na Coruña e Vigo superan o milleiro de positivos diagnosticados nas últimas 24 horas.
Estas dúas zonas concentran case a metade do total de persoas co virus en Galicia.
A Coruña : 12.935
Vigo : 15.724
Ourense : 5.915
Santiago : 10.398
Lugo : 6.217
Pontevedra : 6.289
Ferrol : 2.829
