Unha explosión de gas grisú nunha galería provocou o accidente con cinco mortos na mina de Cerredo
Os traballadores realizaban labores de investigación para o posible uso do mineral en grafito
Todos os falecidos e varios feridos son veciños da comarca leonesa de Laciana
Cinco traballadores perderon a vida e outros catro resultaron feridos de gravidade tras unha explosión na mina de Cerredo, situada no concello asturiano de Degaña, preto da comarca leonesa de Laciana.
A principal hipótese que manexan a Policía Xudicial e a Brigada de Salvamento Mineiro apunta a unha acumulación de grisú como orixe do sinistro.
Este gas, presente nas minas de hulla, pode provocar explosións violentas ao entrar en contacto co aire.
O accidente tivo lugar arredor das 8:45 da mañá deste luns.
Inicialmente, notificouse unha explosión causada por unha máquina, pero as investigacións apuntan agora a un embolsamento de grisú.
No momento do suceso, os operarios realizaban traballos cun permiso de explotación vinculado á posible produción de grafito.
As autoridades locais e autonómicas trasladáronse ao lugar dos feitos. A delegada do Goberno en Asturias, Adriana Lastra, expresou o seu fondo pesar polo sucedido e destacou que “o grisú volveu golpear, lembrando outros accidentes que marcaron a historia mineira”.
Pola súa parte, a conselleira de Transición Ecolóxica, Industria e Comercio, Belarmina Díaz, mostrou a consternación do Goberno asturiano e transmitiu o apoio ás familias das vítimas. Asegurou que se investigarán todos os detalles do accidente para esclarecer o ocorrido.
O presidente do Goberno, Pedro Sánchez, mandou "un sentido abrazo" aos familiares das vítimas mortais no accidente da mina de Cerredo (Asturias) e desexou unha pronta recuperación aos feridos.
Un sentido abrazo a los familiares de las víctimas mortales del accidente producido en una mina en Degaña, Asturias. Y mi deseo de una pronta recuperación a quienes han resultado heridos.
— Pedro Sánchez (@sanchezcastejon) March 31, 2025
Gracias a los servicios de emergencia que están trabajando en las labores de rescate.
"Un sentido abrazo aos familiares das vítimas mortais do accidente producido nunha mina en Degaña, Asturias. E o meu desexo dunha pronta recuperación a quen resultou ferido", expresou o xefe do Executivo nunha mensaxe na rede social X.
Tras a explosión, mobilizouse a Brigada de Salvamento Minero de Hunosa.
Catro brigadistas e o director do operativo foron trasladados en helicóptero ata o lugar, mentres que outros tres chegaron por estrada para colaborar no rescate dos traballadores atrapados.
Dos feridos, dous foron trasladados ao hospital de Villablino: un home de 39 anos con queimaduras foi derivado ao Hospital do Bierzo en ambulancia, e outro de 47 anos foi evacuado en helicóptero ao Complexo Asistencial Universitario de León, tamén con queimaduras graves.
Un terceiro ferido, de 36 anos, presentaba un traumatismo cranioencefálico e foi trasladado ao Hospital Carmen e Severo Ochoa de Cangas do Narcea, e posteriormente ao Hospital Universitario Central de Asturias (HUCA), en Oviedo.
Un cuarto ferido, veciño de Degaña, tamén foi ingresado neste último centro con prognóstico moi grave.
O suceso causou gran consternación entre familiares e amigos dos mineiros (TPA)
Entre os accidentes máis graves rexistrados nunha mina en España
O accidente deste luns en Cerredo sitúase entre os máis graves rexistrados nunha mina en España, con cinco falecidos. A maior traxedia producíase hai xa case 30 anos en Mieres, tamén en Asturias. Catorce mineiros perderan a vida logo dunha explosión de gas grisú no pozo San Nicolás, pertencente a Hunosa.
Inaugurada en 2009 como unha das máis modernas de España , a mina de Cerredo atopábase practicamente sen actividade desde fai sete anos, aínda que desde o verán pasado a empresa Blue Solving contaba con autorización para un proxecto de investigación sobre usos alternativos ao carbón.
Imaxe de arquivo da zona en que se produciu o suceso (TPA)
Segundo comentou a conselleira de Industria, no punto no que se produciu o accidente mortal estaban a executarse traballos "normais nun permiso de investigación complementaria".
O último accidente no interior desta mina, caracterizada por ter un túnel de varios quilómetros polo que poden entrar camións de gran tonelaxe, tivo lugar o 25 de agosto de 2022 cando faleceu un traballador e outro resultou ferido, aínda que nesa ocasión tivo lugar cando ambos se atopaban no exterior e perderon o control dun vehículo.
