O equipo vigués xa coñece dez posibles rivais na Europa League
Aston Villa e Crystal Palace da Premier, Bolonia e Roma da Serie A ou o Porto son equipos que xa están clasificados para a vindeira edición da competición europea
Xa coñecemos once equipos que estarán na vindeira edición da Europa League e un deles é o Celta. Nun principio o equipo vigués estará no Bombo 4 e terá que xogar oito partidos nesa fase de grupos, catro en Balaídos e catro fóra da casa. Este cambio de formato da temporada pasada consolídase este ano nunha competición que comezará o 24-25 de setembro.
Inglaterra ten garantidos dous equipos: o Crystal Palace que acaba de gañar a Copa e o Aston Villa de Unai Emery que tan boa Champions fixo o ano pasado. A Serie A italiana tamén achega dous equipos, o Roma e o Bolonia. De Alemaña virán o Stuttgart, como campión da Copa, e o Friburgo. O Lille e o Lyon serán os representantes da Ligue 1 francesa, o Go Ahead dos Países Baixos e o veciño Porto.
Dentro das previas tamén hai equipos moi potentes e con historia. O Spórting de Braga que adestrou Carvalhal, o Anderlecht de Bélxica, o Partizan de Serbia ou o Young Boys de Suiza terán que pasar varias fases previas. Outros chegarán procedentes da Liga de Campións para conformar un elenco de 36 equipos que van estar no bombo final.
