O Celta, preparado para afrontar a campaña máis ilusionante
As adquisicións de Ilaix e Borja Iglesias en propiedade e as fichaxes de Bryan Zaragoza ou Jutglá enchen de optimismo aos seareiros
O Xetafe será o primeiro rival en Balaídos (domingo, 17:00 horas)
O Celta comeza en Balaídos diante do Xetafe a temporada da ilusión. A do regreso a Europa, o segundo proxecto de Claudio Giráldez, ese que enganchou aos seareiros e que acabou do mellor xeito a campaña pasada, cun sétimo posto que estivo por riba do agardado e cun fútbol que namorou en moitos partidos.
Houbo troco na portería. Guaita deixou o seu sitio ao romanés Radu. É a única liña do campo que esperta algunha dúbida. Tamén marchou Fer López por unha boa cantidade de diñeiro á Premier e o club aproveitou ese movemento para reforzarse en ataque. Dous xogadores son garantía de rendemento. Ilaix e Borja Iglesias foron adquiridos en propiedade despois de completar o ano pasado cesións cun resultado sobresaínte.
As outras dúas novidades son Ferrán Jutglá e Bryan Zaragoza. O segundo é o que esperta paixóns. O primeiro, non está nos focos pero o rendemento no Bruxas belga estivo a un nivel moi alto. No tocante a altas e baixas está recuperado da doenza que tiña Pablo Durán, que recibiu a alta médica. Son baixa para o encontro Cervi, Aidoo, Starfelt -problema muscular no bíceps femoral- e Damián, que tampouco entrou na lista definitiva.
📋 A lista de convocados do @RCCelta para o partido diante do @GetafeCF
— En Xogo tvG2 (@EnXogo_tvG2) August 16, 2025
❌ Son baixa Starfelt, Damián, Aidoo e Cervi pic.twitter.com/JpDpXgMTS4
En fronte estará un Xetafe con problemas para inscribir as novas fichaxes. Bordalás conta con quince xogadores, catorce se temos en conta que Domingos Duarte está sancionado. Desde a directiva apertan para formalizar algunha ficha máis aproveitando a marxe salarial que lles deu a venda do central Alderete. Pero as dúbidas son moitas no equipo de Bordalás que non saberá ata xusto antes de comezar o partido con quen vai poder contar.
