Nomean o fiscal que investigará o fillo de Joe Biden
Nomean o fiscal que investigará o fillo de Joe Biden
Está acusado de non declarar correctamente os seus impostos en 2017 e 2018 e de posesión dunha arma de fogo
![Arquivo](https://img-g24-crtvg.flumotion.com/prog24/2023/20230715/202307147226WD-USA-BIDEN_O__frame_1126.png)
O secretario de Xustiza de Estados Unidos, Merrick Garland, anunciou este venres o nomeamento dun fiscal especial para a investigación contra Hunter Biden, o fillo do presidente do país, Joe Biden.
O elixido é David Weiss, o fiscal federal de Delaware que liderou ata o de agora as pescudas desenvolvidas contra Hunter Biden: este xurista "supervisará a investigación e decidirá onde, cando e se presentar cargos" e "non estará suxeito á supervisión diaria de ningún funcionario do departamento", precisou Garland.
Hunter Biden está acusado de non declarar correctamente os seus impostos en 2017 e 2018 e, ademais, imputóuselle un delito relacionado coa posesión dunha arma de fogo, que é ilegal cando se trata dunha persoa con adiccións.
A investigación contra Hunter Biden abriuse en 2018 durante o mandato de Trump e foi utilizada polos conservadores para atacar ao presidente demócrata, ao que acusan de non facer ningún esforzo para levar esta indagación ata o final.
Pouco máis dun ano antes de que se celebren eleccións presidenciais nos Estados Unidos e con Trump acusando a Biden de perseguilo politicamente, o Goberno estadounidense decidiu hoxe facer un novo movemento nomeando a Weiss, que no pasado foi elixido por Trump para ocupar o posto, co fin de refutar as críticas republicanas de que o proceso está politizado.