Madrugadas e mañás baixo cero e con néboas nas cidades de Lugo e Ourense
En Manzaneda, rozaron os 5 graos baixo cero, a temperatura mínima de Galicia
Tamén houbo xeadas e moito frío en lugares como Arzúa, onde baixaron ata os -2 graos
Pola contra, na cidade de Vigo gozaron dunha mañá de domingo de ceo despexado e solleiro
Unha masa de aire moi frío deixou unha noite e unha madrugada xélidas, especialmente nas zonas da montaña da provincia de Ourense. En Manzaneda, rozaron os 5 graos baixo cero, a temperatura mínima en Galicia.
Pero tamén houbo xeadas e moito frío en localidades do interior como Arzúa, onde o termómetro baixou ata os -2 graos.
Unha friaxe que non impide os paseos de domingo, pero as primeiras horas estiveron marcadas pola mesta néboa na cidade de Lugo e tamén en Ourense.
Un frío de xaneiro que no rural mantén as chemineas a pleno rendemento todo o día. Con todo, os máis maiores lembran que era peor o inverno e o frío de antes.
E mentres entre o nubeiro vai saíndo o sol no interior, en Vigo gozaron xa dunha mañá de ceo despexado e luminoso. Unha xornada para aproveitar antes de que volva a chuvia.
