Keiko Fujimori, proclamada presidenta electa do Perú polo Xurado Nacional de Eleccións

 A dereitista Keiko Fujimori, filla e herdeira política do expresidente peruano Alberto Fujimori (1990-2000), foi declarada este venres oficialmente presidenta electa do Perú, ao proclamárense os resultados da segunda volta da elección presidencial.

Fujimori venceu o esquerdista Roberto Sánchez por unha estreita marxe de 49.641 votos.

O Xurado Nacional de Eleccións (XNE) do Perú, a máxima autoridade electoral do país, aprobou os resultados, tras os intentos sen éxito de Sánchez de frear este acto, ao denunciar sen probas unha suposta fraude na súa contra e reclamar a anulación da votación no exterior, o que lle daría a vitoria a el, que foi o candidato máis votado no territorio nacional.

A proclamación dos resultados do XNE supón a finalización do proceso electoral sen que poida haber xa volta atrás sobre o resultado, no que Fujimori obtivo o 50,135 % dos votos válidos, ao recibir 9.223.396 papeletas, fronte ao 49,865 % de Sánchez, que acumulou 9.173.755 apoios.

A votación celebrouse o pasado domingo 7 de xuño e, case un mes despois, produciuse este venres a proclamación dos resultados, debido ao lento proceso de escrutinio do sistema electoral peruano, que esixe que as actas sexan trasladadas fisicamente ata as sedes da Oficina Nacional de Procesos Electorais (ONPE) para seren contabilizadas.

Isto implica que aquelas actas que presenten inconsistencias deben ser previamente revisadas polos xurados electorais, o que inclúe en ocasións reconto de votos, circunstancia que alongou durante semanas a confirmación da vitoria de Fujimori pola axustada marxe entre ambos os candidatos.

O seguinte paso será a entrega das credenciais a Fujimori, nun acto previsto para o próximo 15 de xullo no Gran Teatro Nacional de Lima; mentres que o 28 de xullo, día nacional do Perú, terá lugar a investidura presidencial, na que Fujimori comezará o mandato de cinco anos para o que foi elixida (2026-2031) xunto a Luis Galarreta como primeiro vicepresidente e Miguel Torres como segundo vicepresidente.

Así, o fuximorismo volverá ao poder case vinte e seis anos despois de que Alberto Fujimori dimitise por fax desde o Xapón tras destaparse un xigantesco escándalo de corrupción na súa administración, despois de que fose reelixido para un terceiro mandato baixo acusacións de fraude.

Keiko Fujimori alcanzou a Presidencia do Perú na súa cuarta candidatura presidencial, tras perder na segunda volta as tres eleccións anteriores fronte ao esquerdista Ollanta Humala (2011), o dereitista Pedro Pablo Kuczynski (2016) e o esquerdista Pedro Castillo (2021).

As dúas últimas decidíronse por 42.000 e 44.000 votos, respectivamente, polo que esta elección foi a terceira consecutiva na que a Presidencia se decide por menos de 50.000 votos, nun país con máis de 33 millóns de habitantes e máis de 27,3 millóns de cidadáns habilitados para votar.

A candidata e líder do partido Fuerza Popular venceu a Sánchez, que competía en nome do expresidente encarcerado Castillo (2021-2022), cunha reivindicación total do legado do seu pai, falecido en setembro de 2024, pouco despois de saír do cárcere ao facerse efectivo un indulto polas condenas que cumpría por delitos de lesa humanidade e corrupción.

A dereitista prometeu derrotar o crime organizado, principal preocupación dos peruanos nestes comicios, como o seu pai conseguiu facer na década dos anos 90 cos grupos subversivos Sendero Luminoso e Movemento Revolucionario Túpac Amaru (MRTA), que chegaron a poñer contra as cordas o Estado e a controlar amplas zonas do país.