Joe Biden vincula os incendios de Colorado co cambio climático

O presidente dos Estados Unidos vinculou co cambio climático os incendios que a principios de 2022 causaron a morte de, polo menos, unha persoa e queimaron máis dun milleiro de casas no estado de Colorado.

Joe Biden visitou a comunidade de Louisville acompañado da primeira dama, Jill Biden, e reuniuse con algunhas das máis de 35.000 persoas forzadas a abandonar o seu fogar polas lapas.

Os lumes provocaron a devastación en comunidades situadas entre Denver e Boulder e causaron danos cifrados en 513 millóns de dólares. Ademais dunha vítima mortal, polo menos outra persoa está desaparecida.

En Louisville, Biden declarou que os incendios foron "tan devastadores" como moitas das crises ambientais que sufriu o país en 2021 e que tiveron un custo de 99.000 millóns de dólares.

"Non podemos negar a realidade de que estes incendios están a ser superpotenciados polo cambio no clima", dixo.

O ano pasado, Biden viaxou en varias ocasións por todo o país para visitar localidades afectadas por eventos de clima extremo, como as tormentas de xeo de Texas, os incendios de California ou os asolagamentos de Nova York e Nova Jersey.

"A situación para o noso país é de código vermello", engadiu.

Precisamente, a comitiva presidencial foi recibida en Louisville por un pequeno grupo de activistas ambientais que se manifestaron cun cartel coas palabras "código vermello".

Para o presidente estadounidense, os incendios son os desastres naturais máis arrepiantes. Segundo dixo, o ano pasado devastaron unha superficie do país equivalente á totalidade do estado de Nova Jersey.

Tras visitar Colorado, o matrimonio Biden ten previsto asistir este sábado nas Vegas ao funeral do exlíder demócrata no Senado, Harry Reid, que morreu de cancro a semana pasada aos 82 anos.