Falece un home tras ser atopado semiiconsciente en Lugo

Un home de 37 anos faleceu o sábado pola mañá en Lugo tras ser atopado semiinconsciente na praza da Liberdade, e aínda que os servizos sanitarios tentaron reanimalo, non puideron facer nada por salvarlle a vida.

De acordo co parte de incidencias da ponte que distribúe a Policía Local de Lugo, sobre as 9:45 horas do sábado, a sala do 092 recibiu información sobre este home que estaba supostamente ebrio e un indicativo da Policía de Barrio desprazouse ata o lugar.

Os axentes localizárono tendido nunha zona axardinada semiinconsciente e sen dar resposta ás preguntas que se lle formulaban, polo que os actuantes colocárono en posición de seguridade e solicitaron unha ambulancia.

O persoal sanitario chegou aos poucos minutos, momento no que o home deixou de responder a estímulos e de respirar e, aínda que realizaron as manobras de reanimación oportunas, finalmente morreu.

A Policía Local logrou localizar un familiar, que compareceu no lugar e confirmou a identidade do falecido, tras o que se iniciaron os trámites necesarios para o levantamento do cadáver.