Exército iraniano: “Señor Trump, ti empezaches esta guerra, pero acabarémola nós”

O exército iraniano advertiu este luns ao presidente estadounidense Donald Trump de que a guerra que empezou con Irán a acabará Teherán e avisou a Washington de consecuencias graves, lamentables e impredicibles polos ataques contra o seu chan.

“Señor Trump, apostador: ti empezaches esta guerra, pero acabarémola nós”, dixo o portavoz do Comando Unificado de Operacións Khatam al-Anbiya, o tenente coronel Ebrahim Zolfaghari, nun vídeo emitido por medios como IRNA.

O militar afirmou que os Estados Unidos entraron directamente en guerra con Irán e violaron o seu chan sacro, en clara violación da soberanía da República Islámica de Irán, polo que sufrirán consecuencias graves, lamentables e impredicibles.

“Os guerreiros do Islam, en resposta a este crime, inflixiranlles consecuencias graves, lamentables e impredicibles con operacións poderosas e selectivas, se Deus quere”, dixo, á vez que sostivo que ampliarán o alcance dos obxectivos lexítimos. Cualificou os ataques contra as instalacións nucleares como un modo de revivir o moribundo réxime sionista que podería propagar a guerra na rexión.

Os Estados Unidos bombardearon onte tres instalacións nucleares iranianas -Fordo, Natanz e Isfahán-, nos primeiros bombardeos estadounidenses que se producen no medio do conflito entre Israel e Irán. Israel e Irán intercambian ataques diarios con mísiles e drons desde a madrugada do venres 13, cando o Estado xudeu lanzou bombardeos contra o país persa. Neses ataques morreron 430 persoas e unhas 3.500 quedaron feridas, a maioría civís en Irán, mentres que en Israel se produciron 24 falecementos.