Cerdán nega liderar a trama de Leire Díez e vese vítima dunha "campaña mediática"

O exsecretario de Organización do PSOE Santos Cerdán reivindicou a súa "inocencia" e mostrou a súa "máis absoluta e radical negativa" ante as acusacións da Unidade Central Operativa (UCO) da Garda Civil que o sitúan como presunto líder dunha trama para desbaratar causas xudiciais contra o Goberno ou o PSOE. Considera que está a ser vítima doutra "campaña mediática".

Nun comunicado remitido aos medios, o exdirixente socialista saíu ao paso da súa nova imputación na Audiencia Nacional, nunha causa onde tamén figuran como investigados a exmilitante socialista Leire Díez ou o exvicepresidente andaluz Gaspar Zarrías, entre outros.

Cerdán nega ter "relación orgánica algunha, e moito menos de superioridade", coa exmilitante socialista Leire Díez e o denominado grupo Hirurok -'Nós os tres', en éuscaro- que se investiga na Audiencia Nacional.

Di que é vítima dunha"campaña mediática" como a que dixo sufrir o ano pasado tras a súa imputación por presuntos amaños de obra pública no caso Koldo, e subliña que "o obxectivo non é investigar delitos, senón esnaquizar persoas", xa que, na súa opinión, a Policía Xudicial non inicia investigacións sobre feitos concretos e logo busca responsables, senón que utiliza "a metodoloxía inversa".

"Ante esta gravísima situación -indica Cerdán​​​​​- reivindico a miña inocencia", e lembra foi citado como testemuña na causa dun xulgado de Madrid que comezou a investigar a Leire Díez sobre os "mesmos feitos" que agora instrúe a Audiencia Nacional.

"Selecciónanse obxectivos e logo diríxense operacións abertas contra eles coa finalidade de atopar 'algo' que poida servir para ensuciar a súa imaxe e minar a súa credibilidade pública. Só así se pode entender que o meu nome vaia circulando sucesiva e progresivamente en distintos temas".