Publicador de contidos

Publicador de contidos

Boluarte di que buscará consolidar a democracia e a gobernabilidade no Perú

Boluarte di que buscará consolidar a democracia e a gobernabilidade no Perú

A nova presidenta nomeou o seu gabinete con oito ministras e nove ministros cun amplo perfil técnico

Aníbal Torres, exprimeiro ministro con Pedro Castillo, pasa "á clandestinidade" tras ser denunciado pola Fiscalía

Dina Boluarte co seu gabinete Dina Boluarte co seu gabinete
G24.gal 10/12/2022 20:28 Última actualización 10/12/2022 23:11

A presidenta peruana, Dina Boluarte, nomeou este sábado o seu gabinete, tres días despois de asumir a xefatura do Estado en substitución de Pedro Castillo, detido e acusado de dar un golpe de Estado.

Nunha cerimonia protocolaria celebrada no Palacio de Goberno, o exfiscal superior Pedro Miguel Angulo Arana xurou o cargo como primeiro ministro. Boluarte instouno a actuar en contra da corrupción.

A mandataria nomeou oito ministras e nove ministros, persoas cun amplo perfil técnico, pero sen vínculos coñecidos cos partidos con representación parlamentaria.

Tras o acto, Boluarte asegurou que as liñas fundamentais do seu Goberno serán consolidar a democracia e a gobernabilidade.

"A consolidación da democracia, o Estado de dereito, o equilibrio de poderes e a gobernabilidade no país é a liña esencial do meu Goberno".

Tamén fixo un "chamado fraterno á calma, á tranquilidade e á paz social" en Perú, tras as protestas que deixaron polo menos sete detidos e oito feridos nas últimas horas.

Sen "cheque en branco"

Ao lembrar que foi elixida como parte dunha fórmula presidencial que gañou as eleccións en xullo de 2021, recoñeceu que non implicar ter "un cheque en branco", senón un compromiso "para saír da crise política e os graves efectos da pandemia".

Prometeu "seguir reactivando o país", a nación do mundo con máis mortes por covid-19, "e atender as necesidades máis urxentes para a cidadanía".

"Quero asegurarlles que traballei arduamente para conformar un gabinete ministerial pola unidade e consolidación democrática que estea á altura do que require o país. Un Goberno que traballe pola reactivación económica e xustiza social, e encamíñenos pola senda do progreso", subliñou.

Finalmente, asegurou que "o Goberno de unidade nacional será para todos os peruanos" e sostivo que manterá o "diálogo" para a "concretización do crecemento económico e a cohesión social".

Clandestinidade

Mentres, Aníbal Torres, exprimeiro ministro do Goberno de Pedro Castillo e considerado un dos seus conselleiros máis próximos, asegurou que pasa "á clandestinidade" tras ser denunciado pola Fiscalía por "perturbación á xustiza" e rebelión.

"A Fiscal da Nación (xeral), sen razón, denuncioume por formar parte dunha organización criminal e perturbación á xustiza. Agora faino por rebelión e outros delitos, só por oír a mensaxe presidencial", escribiu en Twitter, en referencia á alocución de Castillo o mércores pasado.

Inmediatamente despois considerou que "os fiscais son operadores políticos" polo que, segundo a súa explicación, tomou a decisión de pasar "á clandestinidade".

Golpe de Estado

O mércores pasado, o entón presidente Castillo anunciou nunha mensaxe á nación, na que amosaba un notable tremor nas mans, que pechaba o Congreso pouco antes de que se votase unha moción de destitución na súa contra para a que, aparentemente, a oposición non contaba cos votos necesarios.

A mensaxe foi considerada maioritariamente como un golpe de Estado e, de inmediato, o Parlamento pechou as portas e adiantou a votación, que contou con 101 de 130 votos a favor e só 6 en contra.

Detención

Mentres os deputados votaban, Castillo saíu pola porta de atrás do Palacio de Goberno co seu escolta policial, que finalmente o detivo, e acompañado por Torres. Tras ser detido, foi trasladado a unha sede policial, tamén na compaña do exprimeiro ministro.

Un día despois, foi presentado nunha audiencia xudicial protocolaria coma en calquera caso de arresto e, de novo, Torres acompañouno como avogado.

Minutos despois da súa primeira mensaxe deste sábado, Torres escribiu unha segunda na que asegurou que a fiscal xeral, Patricia Benavides, o incluíu "como investigado" e apartouno da defensa de Castillo. 

"Están a illalo e humillalo para dar a mensaxe de que ninguén do pobo se atreva a gobernar o país. A miña incólume lealdade con Pedro Castillo, é a miña lealdade co pobo", afirmou.

Este venres, o congresista e tamén exprimeiro ministro Guido Bellido declarou que Castillo "non lembra" ler a mensaxe á nación na que ordenou o peche do Congreso e a instalación dun goberno de emerxencia. Segundo insinuou tras visitalo no penal, puido ser drogado para facelo.

Publicidade
Publicidade
Publicidade
Publicidade