Aspas asegura que se vai retirar no Celta, pero non sabe cando
Aspas, en Ao contraataque: "As ofertas non me farán cambiar a opinión"
"Agardo que o Deportivo suba o máis pronto posible"
Iago Aspas concedeu unha entrevista Ao contraataque, o programa deportivo da Radio Galega. Como é habitual o moañés está moi cómodo cando se fala de fútbol. Analizou a mellora do equipo desde a chegada de Claudio Giráldez e que o novo estilo de xogo favorece as características dos xogadores.
Tamén fixo unha análise polo miudo dos compañeiros que ten en ataque. "Larsen ten máis calidade e Tasos é un xogador máis de forza", comentou Aspas. Considera complicado que poidan xogar os tres xuntos de inicio pero "si un partido temos que remontar é unha opción que non hai que desbotar".
En clave persoal asegurou que se vai retirar no Celta, pero non sabe cando.
"Teño a miña vida aquí, a toda a miña familia. Son feliz".
"As ofertas non me farán cambiar a opinión. Xa non gasto en representante (risas)".
Non o verán xogando en Arabia Saudita ou países similares. Nin nos Estados Unidos, que é outro retiro habitual.
Aspas tamén falou da posibilidade de xogar outra vez un derbi contra o Deportivo. "Agardo que suban o máis pronto posible. Este ano teno na man, que haxa equipos galegos no fútbol profesional ponme ledo" aínda que ve complicado que se poida volver a enfrontar ao club coruñés porque "xa teño preto o meu retiro e vai ser difícil coincidir".
