Amin empata no engadido e saca o Ourense C. F. do descenso directo
Empatou no difícil campo do Valladolid Promesas (2-2) cun dobrete do dianteiro ourensán
O Ourense C. F. salvou un punto no campo do Valladolid Promesas no tempo engadido. Pode parecer pouco pero con ese gol de Amin no minuto 92 saca o equipo ourensán do descenso directo e as súas posibilidades de salvación aumentaron nunha alta porcentaxe.
O inicio do partido foi de tolos. En dez minutos víronse tres goles. Chuki adiantou o Valladolid no primeiro minuto. Empatou Amin no catro e Chuki repetiu no dez.
O Ourense C. F. levou o peso do partido e gozou de claras ocasións, sobre todo un remate de Jerín ao traveseiro e outro de Ebuka que sacou con moitos problemas o porteiro local.
No segundo tempo seguiu o equipo de Rubén Domínguez dominando pero sen gozar de moitas ocasións. A ledicia foi total no minuto 92 co tanto de Amin que fixo xustiza ao que se viu no Anexo de Zorrilla.
