A Coruña, primeiro municipio de Galicia declarado mercado tensionado o que permitirá limitar o alugueiro

A Consellería de Vivenda manifestou que, "en cumprimento da Lei estatal de vivenda, a Xunta accede á petición do Concello da Coruña para declarar todo o termo municipal como zona tensionada".

Trátase dunha medida que, segundo o Executivo galego, "non vai solucionar o problema de acceso á vivenda na cidade da Coruña, do mesmo xeito que agravou estes problemas noutros lugares onde se implantou".

"Os datos demostran que o intervencionismo no mercado non funciona", insiste a Xunta.

A Lei polo Dereito á Vivenda establece que as zonas tensionadas poden ser aquelas nas que a carga media do custo da hipoteca ou do alugueiro no orzamento persoal, máis os gastos e subministracións básicos, supere o 30 % dos ingresos medios ou da renda media dos fogares.

O Concello da Coruña, que presentou a solicitude o 8 de abril, ten un prazo de dous meses para aprobar o plan específico de medidas, así como o calendario de desenvolvemento das mesmas.

A declaración de zona residencial tensionada, que abre a porta a medidas como a conxelar os alugueiros, ten unha vixencia de 3 anos. O Estado deberá dar o visto e prace a esta medida.