A UCO rexistra as sedes de Acciona en Bilbao e Madrid dentro da investigación a Cerdán

A Unidade Central Operativa (UCO) da Garda Civil está a rexistrar este venres dúas sedes de Acciona en Madrid e Bilbao no marco dunha peza secreta aberta polo xuíz do Tribunal Supremo Leopoldo Puente sobre o exdirixente do PSOE Santos Cerdán.

Fontes próximas á investigación afirman que os axentes acudiron ás citadas instalacións da construtora para efectuar os rexistros ordenados polo maxistrado nunha dilixencia na que non se prevén detencións. 

Ademais, segundo fontes próximas á investigación, tamén acudiron ás instalacións en Sevilla dunha empresa relacionadas coa trama para pedir documentación, e rexistraron as cooperativas Noran e Erkolan en San Sebastián.

Finalizados os rexistros, en Bilbao víronse os axentes da UCO saíndo do inmoble levando cada un deles unha mochila, sen poder saber se no interior había algún material incautado.

O informe da UCO que derivou na dimisión de Santos Cerdán como deputado e secretario de Organización do PSOE apuntaba a posibles irregularidades nas adxudicacións para Acciona da obra do túnel de Belate, en Navarra.

No documento apuntábase ao pago de "altas cantidades de diñeiro" a Ábalos e ao seu exasesor Koldo García presuntamente a cambio de contratos públicos, e tamén de contraprestacións económicas que proveñen,  presuntamente, de Acciona.

Acciona é a adxudicataria de varias obras públicas nas que a UCO puxo o foco na investigación do Supremo a Santos Cerdán e ao exministro José Luis Ábalos, entre outros, por unha presunta repartición de comisións en adxudicacións públicas.

Ao enviar a prisión a Santos Cerdán, o xuíz resaltou as obras adxudicadas a Acciona que estarían baixo sospeita, duns 537,2 millóns de euros, e sostivo que "o botín indiciariamente obtido por, ou comprometido para" Ábalos e Koldo García sitúase ao redor dun millón de euros.

Destacou o "elocuente denominador común" das obras presuntamente amañadas en diferentes provincias (Logroño, Sevilla, Murcia, Barcelona): todas foron adxudicadas a Acciona Construción, que concorría en UTE con empresas de menor envergadura, sen que en ningún caso a adxudicataria presentase a mellor oferta económica, senón que foi favorecida por criterios de valoración subxectiva.

O maxistrado requiriu a esta empresa os expedientes de adxudicación de cinco obras licitadas polo Adif e a Dirección Xeral de Estradas en Logroño, Barcelona, Sevilla e dúas en Murcia.

Entre as adxudicacións investigadas figura o proxecto de construción de tirantes do Puente do Centenario, en Sevilla, no que Koldo García, e "especialmente" Santos Cerdán, segundo a UCO, terían interese.

E en relación a unha das cooperativas ás que acudiu este venres a UCO, Noran, aparece no informe policial que derivou na imputación de Cerdán, quen tería poder de decisión sobre a mesma.

Segundo a UCO, esta cooperativa constituíuna o exasesor ministerial Koldo García xunto a Antxon Alonso, administrador doutra empresa, Servinabar, e vinculado a Cerdán. Tamén está investigado no Supremo.

Ambas as empresas estaban vinculadas á execución do proxecto Mina Muga, segundo a UCO, que destacou nun informe que Noran recibiu 360.165 euros de Servinabar.