"Se temos que perder, que sexa deste xeito"
Xogadores e adestrador do Celta amósanse decepcionados pola oportunidade perdida, pero orgullosos do partido xogado na Cerámica
Ao remate do partido había caras longas nos xogadores e corpo técnico do Celta. Estivo moi preto a terceira vitoria consecutiva. Xeraron moitas máis ocasións que o Vilarreal nun partido absolutamente tolo e que foi un recital de fútbol de ataque.
"Para min o fútbol é unha festa", aseguraba o adestrador Claudio Giráldez, que foi con todo polos tres puntos. O Celta non se conformou co empate "e de 100 veces gañamos este partido 99" polas ocasións estragadas nos últimos dez minutos con dúas opcións de Swedberg e unha de Douvikas. "Se temos que perder, que sexa deste xeito".
Borja Iglesias, que se estreou na titularidade e como goleador, opinaba de igual maneira que o adestrador. Estaba orgulloso da proposta de fútbol dun Celta ao que só lle faltou unha pinga de sorte para levar o triunfo nun deses partidos dos que fan afección.
