Os incendios arrasan xa máis de 10.000 hectáreas en Portugal
Os incendios arrasan xa máis de 10.000 hectáreas en Portugal
Xa arderon 10.000 hectáreas, e máis de 700 persoas tiveron que ser evacuadas
A vaga de calor e o vento dificultan a extinción dos incendios que asolan Portugal desde hai varios días e que xa custaron unha vítima mortal.
Estas condicións meteorolóxicas levaron ao primeiro ministro luso António Costa a cualificar este xoves como a xornada máis grave na loita contra o lume.
O estado de continxencia vaise manter, en principio, ata este domingo.
O país enteiro está desbordado.
Na freguesía de Lanhelas, en Caminha, ninguén pegou ollo esta noite porque toda a veciñanza se entregou en protexer as casas que estaban ameazadas polas lapas.
Os incendios no norte están todos baixo control, tamén baixo vixilancia para evitar que se reaviven esas chamas.
O fume segue chegando a Galicia a través da fronteira coa provincia de Pontevedra.
As columnas de fume que se divisan desde Tomiño, Tui, A Guarda e O Rosal dan idea da magnitude da tensión que viviu a poboación dos municipios da raia portuguesa.
A acción solidaria da veciñanza salvou da destrución moitas casas de parroquias coma as de Lanhelas, en Caminha.
O de Caminha foi un dos incendios máis voraces do norte do país.
Medios aéreos e terrestres continuaron traballando na zona para mantela controlada.
A vaga de incendios deixa unha vítima mortal en Aveiro e máis dun cento de feridos en todo o país.
Ademais, xa se queimaron dez mil hectáreas e setecentas persoas tiveron que ser evacuadas.