Unha forte treboada provocou anegamentos en Burela
Unha forte treboada provocou anegamentos en Burela
Outros concellos como Viveiro e Cervo tamén se viron afectados
A marea alta intensificou os efectos da forte chuvia
As treboadas sucédense estes días en diferentes puntos de Galicia, causando problemas ao seu paso. No caso da Mariña, foi en Burela onde levaron a peor parte. A intensa chuvia e a suba da marea deixaron anegada a zona do porto, o que provocou entradas de auga en negocios e vivendas e interrompeu o tráfico rodado.
Vinte minutos pero suficientes para provocar importantes asolagamentos nas rúas de Burela, especialmente da zona portuaria. Os efectivos de Protección Civil tiveron que atender numerosas chamadas de veciños e donos de negocios que vían como a auga entraba nos inmobles. Esta mañá seguían os labores de limpeza.
A cantidade de auga que deixou a treboada fixo que os colectores colapsaran. Iso, sumado ao feito de que a marea estaba aínda subindo e empurraba cara a dentro o que saía polos aliviadoiros, derivou en que a auga e os residuos se amorearan sobre o firme.
Burela, onde comezan hoxe as festas patronais, segue en alerta amarela polo que as treboadas poderían volver esta tarde.
