Un mozo de 18 anos mata a tiros 19 nenos e dous adultos nunha escola de Texas
Un mozo de 18 anos mata a tiros 19 nenos e dous adultos nunha escola de Texas
O atacante foi abatido pola policía logo de intentar fuxir do colexio, onde os alumnos teñen entre 7 e 10 anos
O presidente Joe Biden pregúntase "cando nos imos plantar ante o lobby das armas?"
A de Texas é a segunda peor matanza nunha escola estadounidense
Polo menos 19 nenos foron asasinados no tiroteo perpetrado por un mozo nun colexio da localidade de Uvalde (Texas, EUA). Na matanza tamén morreron dous adultos e o atacante, quen foi abatido pola policía.
Segundo as autoridades texanas, o agresor, Salvador Ramos, de 18 anos, irrompeu cunha arma de man, unha pistola ou un revólver, e cun rifle, sobre as 11:37 hora local no colexio de Uvalde, a uns 133 quilómetros de San Antonio.
O sarxento do Departamento de Seguridade Pública de Texas, Erick Estrada, explicaba en declaracións á canle CNN que o sospeitoso disparou contra a súa avoa antes do ataque na escola.
Segundo o relato de Estrada, o mozo levaba un chaleco antibalas, o rifle e unha mochila, e foi abatido logo de estrelar o seu coche contra un balado. Segundo explican outras fontes, nese momento tratou de fuxir e disparou contra os axentes.
Varios superviventes están sendo atendidos en hospitais da zona, polo que o balance de falecidos podería subir.
O gobernador de Texas, Greg Abbott dicía nunha comparecencia que o sucedido é "unha traxedia horrible, que non se pode tolerar".
Pero o certo é que este gobernador, republicano, é un firme defensor das armas de fogo e o ano pasado firmou leis estatais que converteron Texas nun santuario para este tipo de armamento. Salvador Ramos comprara dous rifles de asalto o día que fixo os 18 anos.
Nun discurso á nación inmediatamente despois de chegar dunha xira por Asia, o presidente dos EUA, Joe Biden, preguntouse cando o seu país se plantará "ante o lobby de armas". "Como nación, témonos que preguntar cando no nome de Deus imos enfrontarnos aos grupos de presión a favor das armas", lamentou Biden, visiblemente afectado.
O presidente ordenou que as bandeiras do país ondeen a medio mastro na Casa Branca e en todos os edificios federais, instalacións militares e buques de guerra ata a posta de sol do próximo 28 de maio.
Agora investigan as motivacións do tiroteo. No colexio, en que os alumnos teñen de 7 a 10 anos, o 90 % deles son latinos. O resto, brancos.
O deste martes é o segundo tiroteo nun centro escolar máis mortífero da última década, despois do ocorrido en 2012 na escola de Sandy Hook en Newton (Connecticut), onde morreron 26 persoas.
Segundo a web Gun Violence Archive os Estados Unidos rexistraron, só no que vai de ano, 213 tiroteos masivos e 140 menores de doce anos faleceron en incidentes con armas de fogo.