Publicador de contidos

Publicador de contidos

Un motorista queda ferido de gravidade nun accidente en Fornelos

Un motorista queda ferido de gravidade nun accidente en Fornelos

A moto bateu contra un coche que saía dun cruzamento

Un helicóptero evacuou o motorista ao centro hospitalario

G24.gal 29/06/2022 13:41

O ferido con prognóstico moi grave é o condutor da moto. Segundo as testemuñas, viaxaba por unha estrada de Fornelos, no concello de Salvaterra de Miño, cando chocou contra o coche, que saía dun cruzamento. O impacto entre os dous vehículos provocou que o motorista saíra despedido cara a un prado lindeiro.

Ocorreu pasadas as oito da tarde deste martes. Un particular avisou o 112, que solicitou a intervención dos profesionais de Urxencias Sanitarias de Galicia.

Un helicóptero medicalizado evacuou o motorista

Enviaron á zona unha dotación a bordo do helicóptero medicalizado con base en Ourense, debido á importancia das lesións que presentaba o motorista e co fin de axilizar o seu traslado ao centro hospitalario. A muller que conducía o coche recibiu asistencia no lugar do suceso.

Tamén acudiron axentes da Garda Civil de Tráfico, membros do Grupo de Emerxencias de Ponteareas e voluntarios de Protección Civil de Oitavén-Tea.

Ademais, foi precisa a intervención do persoal de limpeza e mantemento da Axencia Galega de Infraestruturas para retirar os restos do choque e recuperar a seguridade viaria.

Inicio do verán tráxico nas estradas galegas

O inicio do verán está a ser especialmente duro nas estradas galegas. Desde a pasada fin de semana houbo catro mortos en accidentes de tráfico. E iso que a primeira operación saída do verán aínda non comezou. 

A DXT prevé máis de 550.000 desprazamentos en Galicia entre as tres da tarde do venres e ata que remate o domingo. Tráfico pide intensificar as medidas de seguridade nestas datas.

Publicidade
Publicidade
Publicidade
Publicidade