Un estudo alerta dunha alta incidencia de violencia sexual nas citas de Tinder

Un estudo da Federación de Mulleres Novas pon no foco as aplicacións de citas. Cunha enquisa a 1.000 mulleres que as usan analizou Tinder, unha das máis activas en España.

O 70 % recoñeceu que se sentiron coaccionadas para manter relacións e unha de cada cinco di que sufriu unha violación.

Unha das coordinadoras do estudo, Mónica Saiz explica que "as violencias e as agresións sexuais son múltiples. Moitas mulleres sofren agresións sexuais con homes cos que foron voluntariamente".

Violencias como as que recoñecen o 30 % das enquisadas ao asegurar que a súa cita seguiu cando elas quixeron parar. A mesma porcentaxe que dixo sufrir presións para prácticas non acordadas entre elas ou non usar preservativo.

Desde a Federación de Mulleres Novas "demandamos educación sexual e afectiva nas aulas, de xeito formal". 

O estudo comprobou que o 60 por cento das usuarias da aplicación recibira propostas de agasallos ou cartos a cambio de sexo. Podemos falar por suposto dunha prostitución 2.0 nas aplicacións de citas", engade Mónica Saiz.

Outros datos reflicten que máis da metade viuse coaccionada a consumir alcol para manter relacións. E unha de cada tres citas tentou gravar ou facer fotos como xeito de presión.