Un camión de dobre remolque queda encaixado nunha cuneta de Brión

Non foi un accidente grave, pero si moi aparatoso. Sucedeu á media tarde de onte na estrada de Bastavaliños, que une Brión con Rois. Por motivos que se descoñecen, o camión saíu da vía e acabou atrapado na cuneta. Sacalo non foi sinxelo, o vehículo tiña dobre remolque e viña cargado de pellets dunha fábrica da contorna. Fixeron falta dous guindastres para rescatalo, e a intervención da Garda Civil e a Policía Local para cortar o tráfico. 

Aos veciños da zona non lles sorprende o sucedido. 

"Por aquí pasan un montón de camións e tráilers enormes a todas as horas, todos os días, é un caso serio".

"Teñen a fábrica ao final da recta e a estrada é estreita para os camións que van e veñen".

Quéixanse de que esta estrada municipal non é axeitada para este tipo de transportes.

"Ao atoparse de fronte teñen que arrimar as orellas e ir moi amodo para pasar os dous. Incluso cando vas cun coche e te cruzas tes que arrimarte á beira". 

E, ao ter que arrimar, ou ben van á cuneta ou ben invaden a senda por onde circulan os peóns.

"Ti vas andando e tes que apartar polos coches que se arriman á beirarrúa".

"É un perigo, hai que andar con moito coidado".

Un perigo que, para estes veciños, se solucionaría ampliando o ancho da vía. Quizais así, din, non volverían repetirse imaxes como a deste camión encaixado na gabia.