Tensión na contorna de Khersón, onde continúa a evacuación de civís
Tensión na contorna de Khersón, onde continúa a evacuación de civís
As autoridades prorrusas aseguran que Kíiv concentra unha gran cantidade de tanques e blindados na zona
As Forzas Armadas ucraínas acusan as atropas rusas de tentar localizar civís que se negan a abandonar a cidade
As autoridades designadas por Rusia en Khersón aseguran que Kíiv concentra unha gran cantidade de tanques e blindados preto desa rexión ucraína no marco dos preparativos para unha inminente ofensiva.
"Concentran cada vez máis equipo. Chegan moitos blindados e tanques", dixo o vicegobernador prorruso, Kiril Stremoúsov, en Telegram.
Segundo o funcionario prorruso, a evacuación de civís desde Khersón continúa.
"Os residentes da cidade aínda poden abandonar sen obstáculos a marxe dereita da rexión de Khersón", informa.
As autoridades ordenaron en outubro a evacuación na rexión dunhas 80.000 persoas na ribeira dereita do río Dniéper ante o achegamento das forzas ucraínas e hai dúas semanas incluíron a capital provincial.
Días despois, estenderon a medida á marxe esquerda para sacar de alí a 70.000 persoas. O Estado Maior Xeneral das Forzas Armadas de Ucraína asegura que as tropas rusas tentan localizar civís que se negan a abandonar Khersón.
As autoridades da veciña rexión de Zaporijia, anexionada por Moscova en setembro, subliñan pola súa banda que están a crear distritos fortificados ante posibles intentos das forzas ucraínas de ampliar o contraataque a ese territorio.