Transportes licita por 17,6 millóns a mellora do firme en case 40 quilómetros da A-52

O Ministerio de Transportes e Mobilidade Sostible licitou por 17,6 millóns un contrato de obras para a rehabilitación do firme da autovía A-52, entre os quilómetros 138 e 176, ao seu paso polos municipios ourensáns da Gudiña, Riós, Vilardevós, Verín, Monterrei e Cualedro.

Tal como informou o Goberno nun comunicado, esta licitación pretende garantir a seguridade viaria dos usuarios, recuperar a capacidade estrutural e funcional do firme e conservar adecuadamente o patrimonio viario de titularidade pública.

"A autovía A-52 é unha vía de alta capacidade clave para a mobilidade, o transporte de mercadorías e persoas e a cohesión territorial do noroeste peninsular, ao unir o sur de Galicia coa Meseta Central", lembrou o Executivo.

As solucións de rehabilitación estrutural que se expoñen consisten na combinación de eliminación parcial e reposición do firme existente cun recrecido, estendendo unha nova capa de rodadura ao obxecto de aumentar significativamente a capacidade estrutural do firme para adecuala ás accións do tráfico e ampliando, deste xeito, o seu período de vida útil.

Entre outras actuacións, repoñeranse as xuntas de dilatación de viadutos e pasos superiores ou se colocarán nos bordos da calzada guías lonxitudinais sonoras.