Un mozo mata a a tiros dez persoas nun ataque racista nun supermercado de Búfalo
Un mozo mata a a tiros dez persoas nun ataque racista nun supermercado de Búfalo
O sospeitoso do ataque está detido pola policía de Búfalo, cidade do Estado de Nova York
A policía investiga como crimes de odio os asasinatos, retransmitidos en directo polo autor, que colgou en Internet un manifesto de tintes supremacistas
Dez persoas morreron nun tiroteo nun supermercado na cidade de Búfalo, no Estado de Nova York.
Un home, detido pouco despois pola policía local, comezou a disparar de xeito indiscriminado contra os clientes dunha tenda situada nunha céntrica avenida da cidade. O tirador, que efectuou entre 20 e 30 disparos, xa foi identificado e posto a disposición da xustiza. "Entendo os cargos", afirmou con tranquilidade, pero o mozo declarouse non culpable da acusación de homicidio en primeiro grao, que podería supoñer cadea perpetua.
Cunha cámara corporal retransmitiu en directo o ataque.
A policía confirmou as dez vítimas mortais e informou de tres feridos pero dixo que a súa vida non corre perigo.
Crime de odio
As autoridades investigan o tiroteo como un crime de odio ou un acto extremista de violencia con motivacións racistas. Das vítimas dos disparos, once son negros e dous de raza branca. Os investigadores avalían un manifesto racista colgado polo tirador en Internet, no que expón os seus motivos para a matanza, e refírese á "teoría da substitución ou gran troco", alentada pola ultradereita e que asegura que a poboación branca está a ser substituída por inmigrantes doutras razas.
O movemento extremista QAnon faise eco desta teoría.
O agresor chegou á tenda situada nun barrio de clase baixa en Búfalo e moi popular na zona, e disparou primeiro contra catro persoas no aparcamento, das que tres morreron. Despois entrou no súper e continuou a disparar. O garda de seguridade, un policía retirado, disparoulle pero ía con casco e chaleco antibalas. A protección repeleu os disparos. O garda é unha das vítimas mortais.
O tiroteo lembra o que se rexistrou en marzo de 2021 en Boulder, en Colorado. Daquela foran asasinadas dez persoas nunha tenda de comida.