Rueda nega presións de Feijóo ou doutros líderes do PP en materia fiscal
Rueda nega presións de Feijóo ou doutros líderes do PP en materia fiscal
O presidente da Xunta asegura que Galicia ten a súa propia senda e amosa a súa intención de "seguir favorecendo as rendas máis baixas"
Rueda di que é partidario de baixar impostos, pero recorda que son o que sosteñen os servizos públicos
Alfonso Rueda di que é partidario de baixar impostos que beneficien os cidadáns e explicou que o martes avanzará as liñas fiscais para o próximo ano cando presente no os presupostos no Parlamento.
O presidente da Xunta, en medio do debate sobre impostos, aclarou que Galicia ten os seus tempos e marca o seu propio camiño e negou presións en materia fiscal de Feijóo ou doutros presidentes do Partido Popular.
"Nós temos que ver, dentro da capacidade fiscal que teñen as comunidades autónomas, que é o máis conveniente facer para os cidadáns que vivimos en Galicia e non en ningún outro sitio", afirmaba Alfonso Rueda.
"Nós temos a nosa propia senda marcada. Cremos que xa dimos mostras diso, que nos preocupaba seguir axudando ás familias", das que destacou o presidente da Xunta que acordaron que as que teñen dous fillos fiscalmente se consideran familias numerosas.
"Volvemos baixar os impostos ás rendas máis baixas, e iso súmase a todas as rebaixas fiscais que fixo Galicia nos últimos anos", afirmaba Rueda que cifra en 6.200 millóns de euros o aforro en impostos acordado pola Xunta desde 2009.
"Os impostos son os que soportan os servizos públicos"
"Aquí apostamos e sabemos o que hai que facer para rebaixar impostos, pero coa premisa fundamental que é que os impostos son os que soportan os servizos públicos", concluíu.
"A mensaxe fundamental é que non sentimos influídos polo que faga ninguén, senón polo que convén aos galegos", afirmou Rueda, que destacou a necesidade de "compasar" as rebaixas fiscais coa prestación de servizos públicos de "calidade".