Pilar Alegría recoñece que foi un erro reunirse con Salazar cando xa se coñecian as denuncias por acoso sexual

Aumenta a presión sobre o PSOE polo caso Salazar. O Consello de Ministros cesou este martes a Antonio Hernández, a man dereita de Francisco Salazar na Moncloa, ao que as denunciantes sinalan como encubridor. A súa saída amplía o cordón sanitario en pleno intento do partido por pechar a crise.

A portavoz do Goberno, Pilar Alegría, afirmou na súa comparecencia deste martes que a reunión que mantivo co excargo de Moncloa e do PSOE Salazar foi "un erro" e "non se tiña que producir", tendo en conta que levou a cabo despois de que varias mulleres presentasen denuncias internas por presunto acoso sexual.

Fotografados xuntos nun restaurante

Alegría foi fotografada a principios do mes de novembro comendo nun restaurante do centro de Madrid xunto a Salazar e nese momento defendeu que se tratou dun encontro cinguido estritamente ao ámbito privado.

Con todo, despois de que o caso escalase nas últimas semanas, sinalou que esa reunión foi unha equivocación.

"El chamoume e eu acudín, non se tiña que producir e foi un erro", sinalou na rolda de prensa posterior ao Consello de Ministros na Moncloa.

A continuación asegurou sentir "dor, indignación e traizón" aínda que deixou claro que este non é "similar nin comparable" ao que poden sentir as vítimas. "É a elas a quen hai que acompañar, coidar e axudar".

Ademais, deixou claro que a investigación aberta no PSOE, baseada en testemuños anónimos de dúas mulleres que traballaron ás ordes de Salazar en Moncloa, debe levar ata o final das súas consecuencias.