Os humanos son máis impulsivos que os chimpancés na adolescencia

Os chimpancés -que poden vivir ata os 50 anos- alcanzan a adolescencia entre os 8 e os 15 anos, unha etapa en que, coma os humanos, experimentan cambios hormonais, forman novos vínculos, móstranse máis agresivos e compiten polo status social.

Con todo, a pesar de que os adolescentes chimpancés e humanos enfróntanse á mesma tempestade psicolóxica, os primeiros son menos impulsivos que os segundos, segundo un estudo da Asociación Americana de Psicoloxía.

O estudo, publicado este luns na revista Journal of Experimental Psychology: General, aborda a vella cuestión de por que os adolescentes asumen máis riscos: é a contorna ou a predisposición biolóxica?

"Os nosos achados mostran que varias características clave da psicoloxía adolescente humana tamén se observan nos nosos parentes primates máis próximos", explica a investigadora principal, Alexandra Rosati, profesora asociada de Psicoloxía e Antropoloxía na Universidade de Michigan.

O equipo realizou dúas probas con recompensas de comida con corenta chimpancés nados en liberdade nun santuario da República do Congo.

Na primeira, chimpancés adolescentes e adultos debían elixir entre dous recipientes: un sempre contiña cacahuetes (un dos seus alimentos preferidos), e o outro, podería conter un alimento que non lles gusta (un toro de cogombro) ou un alimento favorito (un toro de plátano).

Os chimpancés podían ir ao seguro e escoller os cacahuetes ou arriscarse e coa opción do plátano ou o cogombro.

Os investigadores gravaron as reaccións emocionais e as vocalizacións dos chimpancés, como xemidos, queixumes, berros, dar golpes na mesa ou rascarse, e recolleron mostras de saliva para estudar os niveis hormonais.

Tras repetir a proba varias veces viron que os chimpancés adolescentes arriscábanse con máis frecuencia que os adultos, e observaron que a reacción de adolescentes e adultos foi moi similar ao recibir o cogombro.

A segunda proba, baseada na famosa "proba do malvavisco" con nenos humanos, examinaba a gratificación retardada: Os chimpancés podían recibir un toro de plátano inmediatamente ou esperar un minuto e recibir tres.

Os chimpancés adolescentes e os adultos elixiron a maior recompensa retardada nunha proporción similar mentres que os adolescentes humanos tenden a ser máis impulsivos que os adultos, polo que é máis probable que elixan a recompensa inmediata, afirma o estudo.

"Sabiamos que os chimpancés son bastante pacientes en comparación con outros animais. Este estudo demostra que, a diferenza dos humanos, a súa capacidade para atrasar a gratificación xa está madura a unha idade bastante temperá", afirma Rosati.

Iso si, os chimpancés adolescentes non estaban contentos coa espera dos toros de plátano adicionais e tiñan máis perrenchas durante o atraso dun minuto que os chimpancés adultos, segundo o estudo.

"O comportamento arriscado tanto en chimpancés adolescentes como en humanos parece estar profundamente arraigado bioloxicamente, pero o aumento do comportamento impulsivo pode ser específico dos adolescentes humanos", conclúe Rosati.