Publicador de contidos

Publicador de contidos

Lesmes ameaza con dimitir se Sánchez e Feijóo non renovan o CXPX

Lesmes ameaza con dimitir se Sánchez e Feijóo non renovan o CXPX

O presidente do Poder Xudicial e do Supremo pediu que o presidente do Goberno e o líder do PP "se reúnan con urxencia e cheguen a un acordo que poña solución definitiva a esta situación insostible"

Filipe VI saúda o presidente do Supremo á súa chegada ao acto de apertura do ano xudicial (EFE/ Juan Carlos Hidalgo)
G24.gal 07/09/2022 08:03 Última actualización 07/09/2022 14:53

O presidente do Poder Xudicial Carlos Lesmes urxiu ao presidente o Goberno Pedro Sánchez e ao líder do PP Alberto Núñez Feijóo a que renoven o CXPX "nas próximas semanas" ou lle devolvan todas as súas competencias, para evitar así a adopción de: "outro tipo de decisións que nin queremos nin nos gustan".

"Solicito pública e solemnemente ao presidente do Goberno de España e ao xefe da oposición, máximos responsables dos partidos políticos con maior representación parlamentaria, que se reúnan con urxencia e cheguen a un acordo que poña solución definitiva a esta situación insostible que acabo de describir, de maneira que o Consello Xeral do Poder Xudicial sexa renovado nas próximas semanas ou, de non selo, sexa restituído na plenitude das súas competencias", dixo.

Lesmes advertiu que, "de non ser atendido este chamamento que hoxe fago, será preciso reflexionar sobre a adopción doutro tipo de decisións que nin queremos nin nos gustan".

Lesmes descartou de plano a posibilidade dunha renuncia colectiva dos vogais, pois "tal comportamento sería irresponsable" pero, en cambio, dixo que "a renuncia individual pode resultar admisible".

No seu discurso durante o acto de apertura do ano xudicial, que presidiu o rei Filipe VI, Lesmes non detallou cales serían esa clase de medidas extraordinarias nun escenario en que as negociacións entre PSOE e PP son inexistentes. Pouco despois concretou, nunha conversa con xornalistas, que entre esas medidas baralla a propia dimisión.

O presidente do CXPX reiterou que a renovación do Consello "debe acometerse con urxencia" e de acordo coa actual lei: "Sen que a poida supeditar ningunha forza política a sucesivas condicións que impiden o cumprimento do claro mandato constitucional do prazo, que non admite interpretacións".

Unha vez que se consume a renovación "e só entón", dixo, será "ineludible" reformar con urxencia o modelo de elección do Consello.

Xunto á polémica dun Consello caducado súmase o mandato expirado de catro dos doce membros do Tribunal Constitucional coas negociacións a contra o reloxo para designar os maxistrados antes do 13 de setembro, que é o prazo límite que marca a lei.

O posible acordo entre o presidente do Goberno e o líder da oposición parece lonxe logo do debate no seu primeiro cara a cara coas posturas enfrontadas. Os socialistas insisten na necesidade da renovación. No Partido Popular acusan o goberno de Sánchez de intervir o Consello e de non responder a ningunha das súas propostas. 

O fiscal xeral, positivo por covid-19

O fiscal xeral do Estado Álvaro García Ortiz deu positivo en covid-19 e non puido presentar este mércores a Memoria da Fiscalía no acto de apertura do ano xudicial, que presidiu o rei na sede do Tribunal Supremo este mediodía.

Álvaro García Ortiz, que tomou posesión do seu cargo o luns pasado, foi substituído no acto de apertura do ano xudicial pola tenente fiscal do Tribunal Supremo María Ángeles Sánchez Conde. García Ortiz ten síntomas leves e atópase ben, informou a Fiscalía Xeral do Estado.

Publicidade
Publicidade
Publicidade
Publicidade