A Xunta aproba o teito de gasto de 12.599 millóns de euros para o 2023
A Xunta aproba o teito de gasto de 12.599 millóns de euros para o 2023
Un 8,2 % máis que o deste ano, "o máis elevado" da historia, anunciou o presidente da Xunta, Alfonso Rueda
O Goberno galego deu o visto e prace este luns a un teito de gasto para 2023 de 12.599 millóns de euros, un 8,2 % máis ca o deste ano, "o máis elevado" da historia, anunciou o presidente da Xunta, Alfonso Rueda.
Nunha conferencia de prensa posterior ao Consello da Xunta extraordinario, Rueda destacou que hai moitas incertezas e incógnitas nos próximos meses, aínda que Galicia aposta por ser "líder en prudencia financeira" e por iso coa cantidade de recursos que terá o próximo ano farase fronte ás "necesidades" da comunidade.
Rueda sinalou que o Instituto Galego de Estatística prevé que a comunidade alcance o PIB anterior á pandemia no primeiro trimestre do próximo ano, "antes que a media do conxunto do país", xa que a pesar das incertezas hai "perspectivas esperanzadoras" e tamén se espera que continúen as "boas cifras de emprego" que se están rexistrando nos últimos meses.
A Xunta prevé pechar 2022 cun PIB do 3,6 % e o 2023 cun 2,7 %
O Goberno galego prevé pechar este ano cun crecemento do produto interior bruto do 3,6 %, case 2,5 puntos por baixo do previsto (6 %) nos orzamentos para este ano aprobados en decembro de 2021; mentres que para o próximo exercicio as previsións son que a economía aumente un 2,7 %, case un punto menos.
A Xunta prevé que Galicia acabe este ano cunha taxa de paro do 10,6 % e que xa o próximo ano, 2023, o desemprego caia por baixo do 10 % (9,8 %), segundo o teito de gasto aprobado este luns e que será debatido e aprobado polo Parlamento galego o vindeiro mércores.
Alfonso Rueda e o conselleiro de Facenda, Miguel Corgos, apelaron á "cautela" a pesar do aumento de recursos -principalmente polo incremento de recadación do ano 2021- xa que hai moitas incertezas e incógnitas e Galicia quere seguir sendo "líder en prudencia financeira", coincidiron.
"Esta marxe extraordinaria débese administrar con cautela porque o futuro non é tan optimista como mostran estes orzamentos, será moito máis moderado", destacou Corgos, quen sinalou que por ese motivo aínda non pode anunciar se os próximos orzamentos, que presentará en tempo e forma o 20 de outubro, conterán novas rebaixas tributarias. Si se pode confirmar, dixo que as contas do próximo ano consolidarán as rebaixas de anos anteriores, así como as anunciadas polo presidente da Xunta durante o seu debate de investidura, o pasado mes de maio.