Acusados de traficar con drogas no Vao logran un acordo para reducir condenas
Acusados de traficar con drogas no Vao logran un acordo para reducir condenas
O fiscal pedía 8 anos de prisión para cada un deles, pero modificou a petición e o xuízo que se ía celebrar este luns saldouse cun acordo polo que se lles condena a penas de 2 a 3 anos
En decembro de 2019 unha operación conxunta da Garda Civil e da Policía Nacional contra o narcotráfico no poboado chabolista do Vao, derivou na detención de 8 persoas, acusadas dun delito contra a saúde pública e outro de integración de rede criminal.
Este luns estaba fixado o xuízo na Audiencia Provincial de Pontevedra. A Fiscalía pedía para todos os acusados 8 anos de prisión.
Os acusados son un veciño de Vilanova e outro de Pontevedra que supostamente eran os provedores da droga; un taxista e dúas mulleres que simulaban ser clientas e que transportaban a mercadoría ata o poboado; e o último elo da cadea eran 3 residentes do Vao que vendían a droga e mesmo poñían a disposición dos drogodependentes un pendello para que consumiran alí.
Pero despois de hora a media todas as partes abandonaban a sede xudicial con satisfacción polo acordo de conformidade que asinaron todos.
O fiscal modificou o escrito de acusación e reduciulles as penas a dous e 3 anos ao aplicarlles a atenuante de confesión e modificar o grao de participación de 3 deles aos que agora considera cómplices e non autores dos delitos.