Publicador de contidos

Publicador de contidos

Rusia lanza un novo ataque aéreo sobre Kíiv, o oitavo no que vai de mes

Rusia lanza un novo ataque aéreo sobre Kíiv, o oitavo no que vai de mes

Segundo as autoridades ucraínas, é o ataque con máis intensidade, co lanzamento do maior número de mísiles no período máis curto ata o de agora rexistrado

Polo menos tres persoas foron feridas

O bombardeo coincide coa volta do presidente Zelenski tras pedir apoio político e militar en Italia, o Reino Unido, o Vaticano e Alemaña

G24.gal 16/05/2023 07:40 Última actualización 16/05/2023 09:18

O exército ruso lanzou durante a pasada madrugada un novo ataque sobre Kíiv, o oitavo no que vai de mes, que ocasionou polo menos tres feridos e que, segundo as autoridades, tivo unha "intensidade excepcional".

"O oitavo ataque aéreo sobre Kíiv desde principios de maio!. Esta vez, o inimigo lanzou un ataque complexo desde diferentes puntos simultaneamente, utilizando vehículos aéreos non tripulados, mísiles de cruceiro e probablemente mísiles balísticos", afirmou este martes Serhiy Popko, xefe da Administración Militar de Kíiv.

O ataque nocturno "foi excepcional na súa densidade", xa que se tratou do lanzamento do maior número de mísiles no período máis curto ata o de agora rexistrado, precisou Popko nunha declaración que reproducen as axencias locais. Segundo informacións preliminares, "a gran maioría dos obxectivos inimigos no espazo aéreo de Kíiv foron detectados e destruídos!" polo exército ucraíno, destacou o responsable militar.

Os bombardeos afectaron a construcións dos distritos da capital de Solomyanskyi, Shevchenkivskyi, Svyatoshynskyi, Obolonskyi e Darnytskyi. Os maiores danos producíronse no distrito de Solomyansky, onde se desencadeou un incendio nun edificio non residencial que afectou a varios automóbiles da zona e polo menos tres persoas quedaron feridas, segundo confirmou o alcalde de Kíiv Vitalii Klitschko. Anacos doutro mísil, presuntamente interceptado polas forzas ucraínas, caeron no zoolóxico da cidade, no distrito de Shevchenkivskyi, onde se avalían aínda os danos.

O novo bombardeo prodúcese tras a volta ao país do presidente ucraíno Volodimir Zelenski, quen realizou durante os últimos días unha xira internacional que o levou a visitar Italia, o Vaticano, Alemaña e o Reino Unido en busca de apoio político e militar para defenderse da invasión rusa. (Axencia EFE)

Publicidade
Publicidade
Publicidade
Publicidade