Media España está en aviso laranxa por altas temperaturas

Máis da metade de España está en alerta laranxa por fenómenos aparentemente tan contraditorios como a calor, as fortes chuvias e as treboadas. Nin fontes nin abanos abondan. 

Así comeza agosto. Con días que non baixan dos 38 graos e noites sufocantes a 25.

A Axencia Estatal de Meteoroloxía confirma que en zonas de Andalucía, Castela a Mancha, Estremadura ou Madrid rexistraranse, cando menos ata o xoves, temperaturas entre 5 e 10 graos por riba do normal nesta época.

Os servizos sanitarios e de emerxencias fan chamamentos á poboación para que extremen a prudencia. Especialmente os nenos, os anciáns e as persoas de risco.

Segundo unha estimación do Ministerio de Sanidade, das mortes que se produciron no mes de xullo, máis de dúas mil atribúenselle ás altas temperaturas. Os maiores picos de mortalidade rexistráronse entre os días 16 e 21, coincidindo coa segunda vaga de calor do verán.