Israel mata 34 persoas que agardaban a repartición de axuda en Gaza

Tropas israelís mataron este domingo 32 gazatís tras abrir fogo contra un grupo de persoas que agardaban a chegada de camións con fariña en Beit Lahia, no norte de Gaza. Ademais, asasinaron outras dúas persoas en Rafah, preto dun dos puntos de distribución de alimentos.

Os corpos de decenas de palestinos chegaron ao hospital ao Shifa, despois de que soldados israelís abriran fogo preto do posto de control militar de Zikim, localizado na liña divisoria do enclave, segundo confirmou unha fonte neste centro médico.

Milleiros de palestinos achegáranse a este punto tras decatárense da chegada de varios camións con alimentos. Varias testemuñas aseguran que polo menos cinco deles foron saqueados.

No sur de Gaza, no barrio saudita en Rafah, dous palestinos morreron por disparos preto do punto de distribución da denominada Fundación Humanitaria para Gaza, segundo unha fonte do hospital Naser.

Sucesos letais como este repítense a diario, xa que esta organización apoiada polos EUA reparte alimento de forma moi limitada en complexos militarizados.

As tropas israelís apostadas a apenas dous quilómetros de alí teñen luz verde para disparar co fin de dispersar as masas, segundo revelou unha investigación recente de Haaretz.

Asasinato de 32 persoas

Este sábado, o Exército hebreo asasinou polo menos 32 persoas nunha situación similar, segundo a Sanidade gazatí. O Exército israelí confirmou abrir fogo e disparar "tiros de advertencia" contra un grupo de persoas, segundo un comunicado castrense.

Dende o pasado 27 de maio, máis de 900 persoas morreron en Gaza mentres tentaban conseguir alimentos, a maioría nas proximidades dos puntos de distribución desta fundación dirixida polos EUA e Israel, segundo datos da ONU.

A organización privada comezou a actuar na Franxa hai dous meses para impedir as operacións humanitarias tradicionais lideradas polas Nacións Unidas.