Dous mortos e polo menos 27 feridos nun novo bombardeo ruso contra Kíiv
O bombardeo tamén deixou medio millón de persoas sen luz na capital ucraína e varios edificios de vivendas en lapas
Rusia lanzou "decenas de mísiles balísticos e de cruceiro" e máis de 500 drons, segndo informan as autoridades de Ucraína
A poboación pasou unha noite máis nas estacións de metro como refuxio
Emerxencias en Kíiv trata restablecer os servizos básicos tras os bombardeos da noite. Foto: Reuters
"Noite difícil" en Kíiv, así definía a situación da capital o ministro de Exteriores de Ucraína, tras o bombardeo ruso desta noite. De momento, morreron dúas persoas e polo menos outras 27 quedaron feridas, tras caeren "decenas de mísiles balísticos e de cruceiro" e máis de 500 drons, segundo informan as autoridades de Ucraína.
"27 persoas resultaron feridas no ataque nocturno do inimigo contra a capital. 17 delas, incluído un neno, foron hospitalizadas polos servizos médicos. Dúas persoas morreron", escribiu na súa conta de Telegram, Vitali Klichkó, o alcalde da cidade.
As alarmas comezaron a soar a primeira hora da madrugada, coa caída dos primeiros mísiles. As autoridades instan a poboación a permanecer en lugares seguros e non saír á rúa; a poboación unha vez máis pasou a noite nas estacións de metro.
Tras o bombardeo tamén se produciron cortes de luz en varios distritos da capital ucraína, que deixaron medio millón de persoas ás escuras, informa a axencia de noticias Ukrinform.
O diario Kyviv Independent informa de que as primeiras sirenas aéreas activáronse en toda Ucraína á primeira hora da madrugada, cando Rusia lanzou decenas de mísiles e centos de drons cara á capital.
Un segundo ataque produciuse sobre as 07:00 da mañá local (05.00 GMT) cando, informa este diario, as forzas rusas volveron lanzar decenas de mísiles, incluídos mísiles hipersónicos Kinzhal, cara á capital, que danaron varios distritos e afectaron varios edificios residenciais, sobre todo nas plantas máis altas.
Producíronse incendios en polo menos seis edificios de apartamentos da cidade.
Pola súa parte, as autoridades rusas informan de dous feridos na rexión de Volgogrado por un dron ucraíno.
As estacións de metros son os lugares máis seguros para buscar refuxio e pasar a noite. Foto: Reuters
É un ataque similar ao do 25 de novembro
Noutra ofensiva similar o día 25, polo menos sete persoas morreron en Kíiv nun ataque ruso con mísiles e drons que destruíu varios edificios en zonas residenciais da capital, nun bombardeo que tiña entre os seus obxectivos o sistema enerxético, que perdeu boa parte da súa capacidade de xeración de electricidade.
Este novo ataque contra Kíiv prodúcese mentres se tenta negociar a fin do conflito, coa visita a próxima semana a Moscova de Steve Witkoff, o enviado especial do presidente dos Estados Unidos, Donald Trump, á vez que se espera en Kíiv, en principio esta fin de semana, a Dran Driscoll, tamén enviado polo mandatario estadounidense
Kíi a noite pasada. Imaxe: Reuters
