Cortes de Internet e desvíos quilométricos por estrada tras o derrubamento dunha vía no Courel
Cortes de Internet e desvíos quilométricos por estrada tras o derrubamento dunha vía no Courel
Algúns veciños teñen que percorrer ata quince quilómetros de máis para saír de Folgoso
Estanse a investigar as causas polas que o tramo de estrada se derrubou
Non houbo vítimas nin danos persoais, pero o impacto na loxística foi enorme. O desprendemento duns douscentos metros da estrada entre Quiroga e Folgoso do Courel deixou durante dous días os veciños sen poderen realizar trámites e consultas a través de Internet, despois de que se vira moi afectado o servizo de fibra óptica. Ademais, é preciso realizar grandes rodeos para poder saír de Folgoso cara a outras localidades como Monforte ou Lugo, onde teñen os hospitais de referencia.
O problema máis visible é o que afecta á louseira da Campa. Os camións teñen que modificar o seu percorrido e trasladar a lousa a través de pistas demasiado estreitas. Os traballos para poder reabrir canto antes o tramo afectado xa están en marcha, pero a dificultade do terreo impide fixar unha data para a reapertura e posta en servizo. Polo de agora estanse a investigar as causas que provocaron o desprendemento, pero algúns veciños din que era algo que xa temían.
Dende o Concello de Folgoso insisten na necesidade de extremar as precaucións ao volante nas estradas que se habilitaron como alternativa provisional.
