Conmoción no barrio lugués da Ponte, de onde era veciño o falecido en Estaca de Bares

Pesar no barrio lugués da Ponte, onde se criaron os irmáns que naufragaron na Estaca de Bares mentres pescaban robaliza. Do falecido no suceso, Manuel Prado Vázquez, de 49 anos, os veciños destacan que era unha persoa moi apreciada e que tiña unha dilatada experiencia como pescador, tanto no río coma no mar.

Os achegados do falecido consólanse sabendo que polo menos o seu irmán sobreviviu ao naufraxio. Iso si, moi preocupados polas secuelas que lle poidan quedar debido aos traumatismos sufridos.

O irmán do finado, Jesús Prado, continúa ingresado no HULA, onde se encontra estable, e non se teme pola súa vida.