Aumentan as denuncias de roubos nas tendas do Ensanche compostelán

Teñen o inimigo na casa. 

"Hai un punto de venda de drogas en fronte e hai unha persoa en particular, que xa é coñecido por todas as compañeiras doutras perfumerías, que nos entra todos os días e leva o que pode", confirma a encargada dun dos comercios afectados.

Pasou nas últimas horas. Roubaron, unha vez máis e van unhas vinte, uns perfumes nunha tenda do centro e intentaron vendelos a só uns metros. 

"Entrou un mozo e preguntou se quería uns perfumes baratos, moi baratos. Díxenlle que non porque xa imaxinei que era mercadoría roubada", comenta a empregada dunha cafetería próxima.

"Hai pouco ofrecéronme un queixo a dous euros. Están buscando cartos por todas partes e os que máis o sofren son os supermercados", coincide outro comerciante.

"E a perfumería, por suposto, porque é un produto moi fácil e moi apetitoso e tamén as ópticas", lamenta Dulce Calvo, outra das afectadas. 

O último ano está sendo un pesadelo, sobre todo nalgúns establecementos que son especialmente apetecibles. Xa tremen pensando no Nadal.

"O perfume é algo moi solicitado e máis nestas datas. Entón, a xente vaille encargando. Tivemos que cambiar o escaparate porque xa entraba directamente, collía o produto. Xa o tiña moi estudado", engade a propietaria de Dulce Calvo.

"Parece que hai varios pisos nesta rúa e que leves o que leves, danche droga", completa a outra encargada.

É unha práctica habitual. De feito, no desaloxo do narcopiso das Fontiñas, a veciñanza puido confirmar as súas sospeitas.

"Había unhas bicicletas, unha Karcher e varias cousas. Encheron dúas furgonetas de cousas que a priori parecían roubadas", explica un veciño do edificio.

Levaban tempo alí. Non sempre os mesmos, pero si o mesmo perfil: inquiocupas dedicados ao tráfico miúdo, que traían os veciños de cabeza. A desesperación chegou a tal punto que mesmo contrataron seguridade privada para evitar o sobe-baixa constante. 

"Polas noites non podían entrar no edificio, entón baixaban eles e vías os mesmos movementos no parque, na rúa, máis abaixo na rotonda..., por todas as partes", engade o home. 

Agora mesmo, o último inquiocupa está detido e o piso precintado. Por fin, respiran aliviado. O que non saben é por canto tempo.