As vítimas da dina piden un seguimento “exhaustivo” das axudas europeas e reclaman visitas institucionais á zona cero

As principais asociacións de vítimas da dina que afectou a Valencia o pasado 29 de outubro reclamaron este martes á presidenta da Comisión Europea, Ursula von der Leyen, un control exhaustivo das axudas europeas destinadas á reconstrución das zonas afectadas. Tamén lle pediron que visite a chamada “zona cero”, compromiso que a dirixente comunitaria aceptou sen fixar aínda unha data.

O encontro desenvolveuse en Bruxelas, tras a invitación feita por Von der Leyen ás vítimas logo da súa visita a Valencia en abril, cando participou no congreso do Partido Popular Europeo pero non se desprazou ás zonas damnificadas nin se reuniu con representantes das asociacións.

Na reunión, que durou arredor de hora e media, participaron membros da Asociación Víctimes Mortals DANA 29-O e da Associació Damnificats DANA Horta Sud València. Ao remate, as entidades agradeceron o encontro con Von der Leyen e coa presidenta do Parlamento Europeo, Roberta Metsola, e denunciaron o "maltrato institucional" que din sufrir por parte da Generalitat Valenciana.

Fondos con garantías e enfoque climático

As asociacións solicitaron que todas as axudas europeas se sometan a un control estrito para garantir o seu uso correcto, evitar desviacións con fins contrarios á loita contra o cambio climático e asegurar que se destinan a actuacións eficaces de reconstrución e prevención.

Segundo os representantes das vítimas, Von der Leyen comprometeuse a vixiar que os fondos se empreguen de maneira adecuada e a favorecer proxectos que teñan en conta a adaptación ao cambio climático. Tamén recoñeceu que a traxedia vivida en Valencia debe servir de aprendizaxe para mellorar os plans de emerxencia en toda a UE.

Na actualidade, a Comisión está a avaliar a solicitude do Goberno español para acceder ao Fondo de Solidariedade. O Executivo estimou en 4.404 millóns de euros os danos elixibles, aínda que Bruxelas só liberou ata agora un adianto de 100 millóns para actuacións urxentes.

Denuncias de abandono e falta de respostas

As asociacións lembraron que, medio ano despois da dina, persisten situacións sen resolver como entre 5.000 e 6.000 ascensores fóra de servizo, escolas destruídas sen obras iniciadas ou centos de garaxes aínda inutilizables. Consideran que o seu relato foi ignorado por parte das autoridades autonómicas.

Durante o encontro, Von der Leyen expresou o seu apoio e cualificounas de "vítimas directas do negacionismo climático". Tamén manifestou que é “inaceptable” que haxa gobernantes escépticos ante o impacto do cambio climático, aínda que evitou sinalar a ningún Goberno en concreto.

Metsola intercederá ante Mazón

A presidenta do Parlamento Europeo, Roberta Metsola, comprometeuse a contactar co presidente da Generalitat, Carlos Mazón, para pedirlle que se reúna coas asociacións. Segundo as vítimas, Metsola prometeu enviar unha carta ou realizar unha xestión directa para facilitar o encontro, aínda que desde a Eurocámara non confirmaron que se trate dunha comunicación formal escrita.

Metsola tamén asegurou que seguirá a situación de preto e que buscará unha data para visitar as zonas afectadas. Subliñou que o apoio europeo debe incluír tamén asistencia psicolóxica para as persoas damnificadas.