Publicador de contidos

Publicador de contidos

Expertos recomendan evitar a interacción coas candorcas porque poden danar as embarcacións

Expertos recomendan evitar a interacción coas candorcas porque poden danar as embarcacións

Aviso dos expertos para navegantes ante o desprazamento de candorcas por augas galegas

As candorcas desprázanse sobre todo para procurar alimento, o atún é o seu obxectivo no tránsito por augas de Galicia
G24.gal 20/07/2022 14:06

O movemento de candorcas por augas galegas lévanos a preguntarlles aos coñecedores destes cetáceos que facer cando se avistan. O perigo está na interacción con elas e que acaben danando a embarcación.

Expertos e estudantes de distintas procedencias seguen desde o centro BDRI de investigación mariña no Grove, entre outros, a presenza de candorcas por augas galegas.

Non é que eses cetáceos se movan preto da costa, porque as candorcas están en tránsito fundamentalmente para procurar alimento. A súa presa principal, o atún, ten o hábitat en 80, 100 e ata 150 metros de profundidade.

Bruno Díaz López, biólogo director da Asociación BDRI para o estudo da diversidade mariña, di: "O venres xa constatamos bastantes grupos de atúns subindo á altura de Sálvora e o sábado deuse o caso da primeira das interaccións dun grupo de candorcas cunha embarcación de vela".

As longas viaxes, con paso por Galicia, que fan as candorcas tamén se deben a razóns sociais; encontrarse con novos grupos. E nese afán, algunhas mesmo entran na interacción co ser humano se este lles fai caso. Porén, ante o avistamento de candorcas, o máis recomendable para o navegante dun veleiro, por exemplo, é facer un alto na singradura.

"Non todas as candorcas se van achegar á nosa embarcación, pero haberá algunhas que poderán facelo para interactuar, nadar diante ou na popa da embarcación. Aí a problemática está en que, ás veces, poden ocasionar danos. Xa hai constatación de que poden ocasionar danos que mesmo poden supoñer quedar á valga.  O que recomendamos é arriar velas ou deter a embarcación. De xeito que non xere unha atracción, un xogo. A dimensión destes animais e a súa actividade, se chegan a excitarse moito, poden ocasionar danos, por exemplo, no temón da embarcación", explica Bruno López.

Iso si, non hai constatación de que as candorcas poidan atacar as persoas.

Publicidade
Publicidade
Publicidade
Publicidade