A Fiscalía Europea investiga contratos da Comunidade de Madrid para mercar material contra a covid-19

A Fiscalía Europea acordou investigar unha denuncia de Unidas Podemos respecto á adxudicación do Goberno de Isabel Díaz Ayuso na Comunidade de Madrid a dúas empresas de varios contratos para combater a pandemia de covid-19 en 2020 que se financiaron con fondos europeos.

En dous decretos, aos que tivo acceso a Axencia EFE este xoves, a Fiscalía Europea incoa un procedemento para investigar a adxudicación mediante a tramitación de emerxencia de sete contratos de subministración de material sanitario a empresas que presuntamente non se dedicaban ao devandito sector: catro a Air Global Media por uns 10 millóns de euros e tres a Vin Doure 24 K por 7,7 millóns de euros.

Segundo a Fiscalía, polo momento e a falta de practicar dilixencias de investigación, das denuncias despréndense "indicios de posible fraude relacionada cos contratos financiados por fondos europeos", o que podería constituír un delito de fraude aos orzamentos da Unión Europea e de estafa.

A orixe dos fondos afectados, sostén, determina a competencia a favor da Fiscalía Europea, que se centrará agora en comprobar os feitos denunciados e concretar os "posibles indicios" da comisión de feitos delituosos, "cuxos contornos aparecen neste momento difusos, sen que se dispoña aínda de elementos que determinen (...) a concreta imputación de ningunha persoa".

Empresa dedicada á comercialización de viños espumosos

Segundo a denuncia, o Goberno da Comunidade de Madrid adxudicou entre marzo e abril de 2020 tres contratos á empresa Vin Doure 24 K, "presuntamente dedicada á comercialización de viños espumosos aos que se engadían partículas de ouro" antes de que esta cambiase o seu obxecto social.

Eran contratos de subministración de material sanitario para o hospital de campaña instalado no IFEMA por 7,7 millóns de euros.

Unidas Podemos denunciou que esta empresa incrementaría a súa cifra de negocios en 4,4 millóns de euros en 2021 pola adxudicación de subministración de tests de antíxenos e que obtería beneficios "desmesurados".

En caso de ser acreditado, todo iso, di a Fiscalía, podería implicar "un incremento artificial do prezo que puidese ocasionar un prexuízo aos fondos europeos", aínda que non exclúe que unha parte dos pagos se correspondesen a gastos de transporte.

Sospeitas de repartición de comisións

A Fiscalía Europea tamén vai investigar a adxudicación á empresa Air Global Media, dedicada presuntamente á radiodifusión, de catro contratos mediante o procedemento de emerxencia por 10.060.500 euros entre abril e xuño de 2020.

Segundo a denuncia, a empresa multiplicaría ata case cincuenta veces a súa cifra de negocio durante o estado de alarma e podería tratar de ocultar a repartición dos beneficios obtidos.

Tamén denunciou Unidas Podemos que podería ser utilizada como sociedade instrumental para recibir os contratos de emerxencia, unha operativa que, sospeitan, podería ir dirixida a ocultar a repartición de comisións millonarias e a ocultar o incremento artificial do prezo do material fornecido.

En todos os contratos denunciados o órgano de contratación foi o Servizo Madrileño de Saúde (SERMAS).