A exposición 'Téxtiles de artistas' chega á Coruña en primicia para España
A exposición 'Téxtiles de artistas' chega á Coruña en primicia para España
Unha viaxe pola arte do século XX con tecidos creados por Picasso, Dalí ou Warhol
Pode visitarse de balde ata o 19 de xuño na Fundación Barrié
Poñer un Dalí de gravata, vestirse cun debuxo de Miró ou abrigarse co cubismo de Piccaso. A través dos tecidos, a xente de a pé puido acceder ao talento dos mellores artistas do século XX.
"Non podes mercar un Picasso, pero si un vestido cunha tea deseñada por Piccaso... é unha cuestión de acceso democrático", explica Dennis Nothdruft, o comisario da exposición, organizada polo Museo da Moda de Londres. Son máis dun cento de pezas e algunhas vense por vez primeira na Coruña. "Como estes vestidos de Warhol que teño detrás, acabamos de descubrilos", di o comisario.
"É a primeira vez que chega a España, é unha ocasión única para explorar a faceta máis descoñecida destes grandes artistas. Hai pezas de roupa e obxectos de fogar como tapices, alfombras ou cortinas", explica Carmen Arias, directora da Fundación Barrié.
Unha relación, a da arte e o téxtil, que chega aos nosos días con forzas renovadas en pezas singulares coma esta.
"Aquí temos un magnífico exemplo da fusión de arte e deseño téxtil, un vestido prestado pola casa de Valentino cun deseño da artista Zandra Rhodes, fundadora do museo que cede a exposición", endade Carmen Arias.
Vestidos de Valentino ou fulares de Chagall que poden verse de balde ata o 19 de xuño na Fundación Barrié.